جلسة نيابات طب الزقازيق 2026

لو حد حابب تخصص تاني اوي بلاش ياخد تخدير هتفضل كل شويه تفكر فيه وتفكر تستقيل
هقول مميزات وعيوب المميزات بتتعلم بسرعه والبرايفت متوفر اغلب الفسم ناس محترمه
العيوب مفيش نظام والاوف قليل رغم العدد ورئيسه القسم مش مرنه في التعامل والقسم عموما مش مرن رغم انه يقدر يسهلها في حاجات كتير

قسم ممتاز ويحتاج الى شخص محب ليعيش فيه بارتياح وشكرا

التخدير من عين محب 🫣😂
1- القسم:
لطيف اوي اوي والناس جميلة وروحها حلوة ومتعاونين جدا وشبه مفيش سنيوريتي.. فانت نفسيا مش هتتعب في وسطهم (طبعا اي مكان لا يخلو من بعض النماذج غير اللطيفة لكن دول قلة قليلة جدا جدا)

2- نظام الحضور:
• أولا: العمل الصباحي:
عندك 5 أيام في الأسبوع عمل صباحي في صورة لست عمليات mainly بتلف فيهم على مختلف التخصثات من أنف وأذن ومخ وأعصاب وعظام ونسا وجراحة أكفال وجراحة عامة ومسالك ورمد و و و.....إلخ..
بتبدأ من 9 وتخلص في حدود الساعة 2 او 3.. فيه لسة ممكن تطول عن كده ولست تخلص بدري عن كده لكن ده الاغلب
• ثانيا: النباطشيات:
كجنيور عندك 13 نباطشية في الشهر، النباطشية 12 ساعة.. فيه ايام نباطشياتها صباحية يعني من بعد اللستة لغاية 11 بالليل وتأوف لغاية تاني يوم الصبح.. وفيه أيام نباطشياتها ليلية يعني هتخلص لستتك وتاخد أوف لغاية الساعة 11 بالليل وتيجي نباطشيتك من 11 بالليل لغاية ما تخلص لستة تاني يوم الصبح
( وفي الغالب هتريحلك ساعتين تلاتة من 5 او 6 الصبح او يمكن من قبل كده او يمكن مش هتريح خالص انت وحظك حسب الشغل😂).. وفيه أيام قمورة اوي بقى هتحضر لستة بس ومتبقاش نباطشي وتروّح😂♥
• الأوف الأسبوعي: عندك 4 أسابيع في الشهر.. منهم أسبوع هتاخد أوف خميس وجمعة سوا.. وباقي الأسابيع خميس بس أو جمعة بس
• العناية: روتة منفصلة مدتها حوالي 6-8 شهور وانت نايب .. بتكون فيها عناية بس مفيش تخدير.. بتكون عبارة عن 10 نباطشيات 24 ساعة في الشهر..
بتدخلها في السنة التانية من نيابتك وبيكون ترتيب دخول الناس ليها حسب ترتيب استلامهم للعمل
(فيه روتة تانية مدتها سنة وانت مدرس مساعد على خير بقى 😂)

3- التعليم:
التخصص من التخصصات اللي الlearning curve بتاعها سريع جدا والناس داعمين جدا ليك في التعليم فهتتعلم بسرعة بإذن الله..
وكمذاكرة تخصص مذاكرته ملمومة وإن كانت كتيرة نسبيا ولكن برضو هيظل ملموم..
والتخصص ممتع فيه الشغل الميديكال وهتقرا في الباطنة والفسيولوجي والفارما،، وفيه الجزء الskills يعني هتمشي ايدك برضو.. وهتتعامل مع جراحين فهتلافي عندك برضو surgical background... فهو تخصص تعليميا ممتع ♥

4- الماديات:
التخدير من أسرع التخصصات في الدخل.. ولكن على المدى البعيد نسبيا هتحس انك وصلت لمرحلة من الثبات سواء في التعليم او في الفلوس (وهي في الاول والاخر ارزاق).. فيه ناس بتشوفها استقرار وميزة وراحة دماغ .. وفيه ناس بتشوفها عيب وانه دايما عايز يجري وعايز زيادة.. حسب شخصيتك..
وحاجة كمان.. شغلك عبارة عن شيفتات سواء تخدير او عناية يعني هتفضل تتنقل من هنا لهنا لغاية ما تكبر شوية وتعمل لنفسك اسم وتثبت لنفسك شغل مع جراحين ترتاحوا سوا وفي اماكن ثابتة

5اللايف ستايل:
بعد زيادة الأعداد والقرار الجديد بإن النباطشيات تبقى 12 مش 24 الموضوع أصبح معقول جدا جدا وهتلاقي لنفسك وقت.. ممكن بصراحة لو انت مش من الزقازيق نفسها متحسش ده اوي لأنه على سبيل المثال هتخلص في يوم الساعة 11 بالليل مثلا ممكن تكسل تروّح او متعرفش تروّح فهتبات في المستشفى او في سكن لو ساكن.. بس يعني برضو اهو هتبقى قاعد مريّح 😂

6- الmedicolegality:
في السما 😂😂
لكن اولا بستر ربنا هتعدي كتير،، واحنا تخصص بجد بتشوف فيه قد ايه ربنا بيسترها معاك.. وثانيا تأمن نفسك على الورق كويس ومتآمنش لحد شفهيا... انت كده كده مع الشغل هتعرف تلمح التلبيسة من بعيد وتتفاداها بإذن الله 😂
+ انت هنا في الجامعة دايما covered بناس أكبر منك وعمرك ما هتتساب لوحدك إطلاقا ♥

7- لو انت من محبي الشهرة والصورة متجيش 😂
احنا هنا جنود الظل حضرتك 😎😂 بتُزهَق أنفاسك مع الحالات في صمت 😂
برضو ناس بتشوفها ميزة انها بعيدة عن التعامل مع المريض والريلاتيف وان الحالة بتفضل فوق دماغك... وناس بتشوفها عيب لانها عايزة تبان في الصورة وهتحس ان ناقصها ساتيسفاكشن.. شخصيات 🤷🏻‍♀️

8- أحسن حاجة انك تنزل تحضر ولو نباطشيتين تلاتة تشوف بنفسك الدنيا على أرض الواقع.. وتسأل عن أي حاجة ممكن تكون ناقصة او مش واضحة في الكلام ده 😂

وأخيرا.. استخير ربنا كتير واسأله التوفيق والسداد ♥♥
ربنا معاكم ♥

تخصص رائع يجمع بين العلم والعمل. شغله برايفت متاح في كل مكان لكن مشكلته قسم الزقازيق قمة السوء في الادارة والتنظيم. ودعم النواب والحكومة ضاء هيئة التدريس شبه معدوم.

التخدير من التخصصات إللي مش واخده حقها، لكنه يزال تخصص زي أي تخصص ليه مميزات وليه عيوب، أغلب إللي مبياخدش تخدير مش مناسب ليه العيوب بشكل كبير، العيوب عموما إنك مش واخد حقك وأي مشكلة أنت بتكون ملطوط فيها و medicolegal عالية وكيرف البرايفت الشبه ثابت والستريس إللي فيه وضغك الشغل والمسئولية إللي فيه، لكن فيه مميزات القسم عندنا اغلبه كويس والناس متعاونة ومفيش سينيورتي أوي والمشرفين في الرسايل أغلبهم كويسين والتعليم سريع والناس هتعلمك ال basic ودايما في حد جنبك وتخصص مطلوب وسفره مازال مطلوب ومناسب للشخصيات إللي مبتحبش أجواء العيادات ولا المرضى ولا وجع دماغ الأهالي.
تخصص بشكل عام مش واخد حقه في مصر لو الهدف السفر هيكون تخصص مناسب.

الصراحة مطولتش في القسم، استقلت خلال ٣ شهور، بس القسم هتتعلم فيه skills حلوة، ولكن مكنتش حاسس بالرضا عن التخصص خاصة اني مكانش اختياري الأول، الضغط شديد جدا في الجامعة لا يُحتمل، عاوز حد معندوش حياة ..😅 وبالتالي لازم تكون حابب اوي التخصص عشان تتحمل برضا ♥️