مستخدم أخفى اسمه
بتاريخ: 2026-03-28 15:04
-أتمنى اي حد ناوي على التخصص ده يقرأ تعليقي كامل لانه هيبقى طويل لكن ان شاء الله ربنا يهديكم الخير.
-أول حاجة: نصيحة عامة حاول تحضر في اي تخصص انت ناوي عليه يوم او يومين كاملين مع نايب وتحضر نباطشياته وتشوف الجو العام للقسم، وتسأل أكثر من حد عن رأيه، الجونيور والسنيور والمدرس المساعد حتى علشان تعرف وضعك هيبقى عامل ازاي تقريبا في كل مرحلة. واختار التخصص ال ترتاح فيه شخصيتك لانه هو ال يكمل معاك مش تاخد اي حاجة وخلاص، لان ناس كثير عملت كدا واستقالت وضيعوا سنين من حياتها فشوف المكان ال تقدر تكمل فيه وتتقبل عيوبه قبل مميزاته.
لازم توازن بين العيوب والمزايا دائما وتختار التخصص ال عيوبه مقبولة ومزاياه اساسية بالنسبة لك.
بالنسبة لقسم الأشعة، الافضل تنزل بنفسك اكثر من مرة تاخد رأي النواب بس ما تحضرش في استقبال الجراحة في ايام الهوت، ممكن تحضر في استقبال الجراحة ايام الكولد او الجمعة او النسا في الهوت بليل، واه احنا بنحضر كل الايام سواء كولد او جمعة في الاستقبال.
أو تسأل في اماكن هادية في الصباحي زي عيادة السونار او السلام او الاطفال او الدوبلر او حتى المقطعية واسألوا اماكن الدكاترة فين هناك علشان تقعدوا معاهم.
ما تسمعش لرأي اي دكتور برة قسم في قسم ثاني، لازم تسأل دكاترة القسم لانك هتقابل فتي كثير.
-تخصص الاشعة من احسن التخصصات في وجهة نظري، لكنه مش تخصص مناسب للكل، لازم ال ياخده يبقى عارف مميزاته وعيوبه كويس ولو متقبلها فهيحب التخصص اوي.
-ايه الحجات ال تخليك تختار تخصص الاشعة او ماتختاروش:
• لو انت شخص مش بيحب التعامل المستمر مع المرضى او مش بيحب يبقى الدكتور المعالج او ياخد قرارات علاجية للحالات فده مكانك ودي من مزايا التخصص النسبية ان علاقاتك بالحالة مش مستمرة ومش بتتاثر نفسيا باغلب الحالات. لكن ده مش ينسيك ان كلمتك ليها تاثير كبير في الخطة العلاجية للمريض.
• لو بتحب تبقى دكتور الحالة فالتخصص مش تخصصك. ودي نقطة مهمة تحطها في بالك: نظرة الناس والاهل لدكتور الاشعة، لانهم دائما في الظل ومحدش فاهم دورهم والاهل دائما بيميلوا لصورة الطبيب المعالج، فلو عندك مشكلة في رأي الناس فيك وبتتاثر بكلامهم فهتتعب شوية في النقطة دي.
• لازم تبقى عارف ان تقريرك في الاشعة بيبتني عليه قرارات كثير في حياة المريض، فلازم تعرف مسؤولية التقرير ده وان اي غلطة في التقرير بتتعرف مع الوقت على عكس التخصصات الثانية ال غلطتهم بتعدي من غير ما حد يعرف اغلب الوقت. لكن محدش كبير على الغلط والحجات البسيطة بتعدي، كلنا بنغلط مع ضغط الشغل ودي حاجة مش توقفك لكن دي نقطة لازم تبقى في بالك علشان يبقى عندك دافع تحسن مستواك وتبقى قد المسؤولية وماتغلطش غلطات كبيرة، لانك لو مش حاسس بالمسؤولية دي ومش ناوي تاخدها جد فهتقابل مشاكل كثير مستقبلا.
• على قد مانت مش معروف للناس والمرضى، الا انك مع الوقت بتبقى معروف من الدكاترة في اغلب التخصصات، لان تخصصنا بيحتاجه كل التخصصات الثانية وبتتعامل معاهم كلهم حرفيا ودي حاجة لازم تعمل حسابها برضو.
• لو انت بتحب التعامل مع الاجهزة فالاشعة كلها اجهزة والتعرف عليها ببقى حاجة ممتعة اوقات دائما، لكن لو انت العكس فده مش هياثر عليك لانك كدا كدا هتتعود.
• لو انت ما بتحبش المذاكرة الكثير ممكن تتعب شوية في التخصص، لكن حابب اقول ان مذاكرة الاشعة ممتعة عن مذاكرة حجات ثانية لانها معتمدة على الصور والوصف بشكل كبير فممكن تكون مابتحبش تذاكر كثير لكن تحب مذاكرة علم الاشعة.
تخصص الاشعة من اكبر التخصصات واوسعهم في المجالات، وعلشان تبقى شاطر فيه هتحتاج تزود علمك باستمرار.
• اخر حاجة ولازم تبقى اخر حاجا في بالك - الماديات: الرزق دائما من عند ربنا ومفيش قواعد ثابتة ومحدش يستنى حاجة ثابتة في الموضوع ده، لكن تخصص الاشعة مطلوب بشكل عام وفيه شغل وهتلاقي عائد كويس بعد فترة، لكن على المدى البعيد في المستقبل لازم تبقى عارف ان متوسط سقف الماديات في الاشعة هيبقى اقل من سقفه في تخصصات ثانية زي الجراحة بالاخص او اي تخصص له عيادة في حالة انهم شغالين كويس يعني، الا اذا قدرت تفتح عيادة او مركز او قدرت توصل لمستوى كويس في التداخلية وده مش سهل برضو. الكلام ده علشان تعرف انك لازم لما تاخد اي تخصص ما تبصش لغيرك في اي حاجة لانه ممكن يعمل فلوس اكثر لكن يتعب اكثر و العكس. وفي الاول والاخر الارزاق على الله ومحدش يختار التخصص بناء على الماديات بس ودي نصيحة. اختيار التخصص المناسب لشخصيتك اهم واول واخر حاجة.
-نظام التخصص في قسم الأشعة:
• بالنسبة لنظام الشغل:
انت كل يوم عليك عمل صباحي من ٩ ل٢، طول الاسبوع ماعد الجمعة بتبقى نباطشيات بس، ومفروض بتاخد يوم واحد اوف مع الجمعة بعد سنة.
اماكن الصباحي في الاشعة كثير وفي كل مكان في المستشفى سواء جامعة او صيدناوي.
النباطشيات ٦ ساعات من بعد الصباحي -ايام العاشر عدد ساعتها اكثر-، وعدد النباطشيات بيختلف على حسب الوقت وعدد الدفعة والظروف الموجودة والديفكتات، الرينج في اول سنة من ١٢ ل١٥، وبيقلوا مع الوقت، ومحدش يستنى عدد قليل في اول سنة.
• اول سنة او ٢ متعبين كشغل ومذاكرة، فلو حد هياخد التخصص علشان يرتاح في نيابته فمايستناش ده اول سنتين لانك هتحتاج تشتغل وتنزل وتتعب وتذاكر كثير اول فترة وفي ايام بيات عادي، الوضع بعد كدا ببقى اخف تدريجيا واللايف ستايل ببقى احسن في المستقبل.
• النباطشية ٦ ساعات، لكنك مش بتوقف شغل فيها، انت بنسبة ٩٠٪ اي وقت انت موجود فيه هتكون شغال.
• التعامل مع الدكاترة كويس اوي والزمايل كلهم متعاونين بجد ودي من مزايا القسم حقيقي ومحدش بيبخل على حد بمعلومة وال يقدر يساعد بحاجة بيساعد قد ما يقدر.
• قسم الاشعة اقل الاقسام من حيث السينيورتي، لكن ده ما يمنعش انك لازم تتعامل مع الكل باحترام خاصة كل ما يزيد فرق السن والخبرة وده لاحترامك لنفسك قبلهم. تحترم دفعتك وزمايلك الاكبر علشان احنا شغالين مع بعض في الاول والاخر وعلاقاتك لازم تبقى كويسة مع الكل.
• كيرف التعليم كويس اوي، بس لازم تجتهد شوية مع نفسك وتطلب وتسأل كثير، لان طريقة الشرح بتختلف من شخص للثاني ومش دائما هتلاقي ال يشرح من نفسه لكن الكل مش بيتأخر لما تسأل فلازم تعرف تطلع المعلومة من ال معاك ازاي.
• الامتحانات بتحتاج مذاكرة حقيقية فنقطة المذاكرة مكملة معانا.
• في عيب في نقطة التعامل مع التخصصات الثانية انك مش دائما بتلاقي تعامل لائق في الريكوستات من الزملاء في التخصصات الثانية وفي abuse فظيع لريكوستات الاشعة لازم تبقوا مستعدين له ومفيش دعم كبير لينا في التعامل مع النقطة دي. فالكلام ده يتحط في الاعتبار علشان محدش يتفاجئ بيه او يتضايق منه ويبقى مستعد يتعامل بذكاء قد ما يقدر.